بنك الحظ هي واحدة من أشهر الألعاب في الوطن العربي و في مصر تحديدا. بتعتمد على المهارات  .الإستراتيجية للعيبة بحيث تقدر تبني إمبراطوريتك بطريقة ممتعة وسريعة

علشان تفوز فاللعبة لازم تجمع تلات مجموعات كاملة بألوان مختلفة. حتستخدم في اللعبة أوراق تديك الحق تاخد أراضي خصومك و أوراق تانية تخليك تطلب منهم يدولك فلوس. لكن خلي بالك من ورقة التخشيبة, وحشة!

وفي أوراق كتيرة تانية حنبقى نحكلكم عنها بعدين.

في البداية حنوزع خمس أوراق لكل لاعب. وبعدها كل لاعب بيبص للورق بتاعو من غير ما يوري لباقي اللعيبة

  • باقي الأوراق منصفطها في النص علشان بينسحب منها لمن يجي دور كل لاعب.
  • بيبدأ اللعب من على يمين الموزع وبينتقل بعكس عقارب الساعة.
  • كل لاعب بيجي دوره بيسحب ورقتين من الكومة اللي قولنا عنها وفحالة مكنش مع اللاعب ولا ورقة فبيقدر وقتها يسحب خمس أوراق بدل ورقتين.
  • يقدر كل لاعب يلعب تلت حركات كحد أقصى أو أقل حسب الإختيار.
  • تقدر تبني أي كشك أو قهوة على المجموعات المكتملة بس, لكن بشرط انك تبني الكشك قبل القهوة
  • مش حتقدر تبني اي كشك او قهوة على على المطارات والمينا. المجموعة السودة بشكل عام مبيتبناش عليها أي حاجه.
  • تقدر تستخدم ورقة الدوبل مرتين على نفس الكارتة بس حتتحسب حركتين.
  • مش حتقدر تبص لبنك اللعيبة التانية خالص بمعنى مش حتقدر تعرف ايه الأوراق الموجودة جوا البنك بس حتقدر تعرف قيمة الفلوس اللي مع كل لاعب.
  • بتستمر اللعبة لحد ما واحد من اللعيبة يقدر يجمع تلات مجموعات كاملة و بألوان مختلفة.

البلاد أو المنشآت : وحتقدر تجمع البطاقات الخاصة فالبلدان اللي من نفس اللون مع بعضيها على طاولة اللعب و تحديدا في المربعات اللي حتلاقيها قدامك. بس اتزكر انك مش حتقدر تجمعها مع بعضيها أو تغير اماكنها إللا فدورك بس.

  • كروت المال أو الفلوس : حيقدر كل لاعب انه يحصل رسوم الكارتة والأعياد. يتتجمع الفلوس في البنك الخاص بكل لاعب ويقدر برضو يودي بطاقات الأكشن التانية للبنك وحتتحسب قيمة البطاقة دي كفلوس وقتها بس حتفضل جوا البنك طول اللعبة.
  • بطاقات الأكشن أو الأمر: ودي حتديك الحق انك تطلب رسوم الكارتة أو انك تسرق حتت أرض من لاعب تاني أو مجموعة كاملة. تقدر تضم البطاقات دي للبنك بتاعك وبتتحسب كفلوس وقتها بس زي ما قلنا حتفضل فالبنك لنهاية اللعبة.
  • بطاقات الإيجار: حتقدر تعرف قيمة كل بطاقة في زاوية الكرت و حسب عدد البطاقات اللي مجمعها من كل لون. فمثلا لو عندك بطاقة الأرض الحمرا و معاك كمان بطاقة الأجار الحمرا تقدر تطلب من أي لاعب يديك تمن الأجرة.

مش حتقدر تدفع من البطاقات الموجودة معاك مباشرة. لما يتطلب منك فلوس ممكن تدفعها عن طريق البطاقات اللي مجمعها في منطقة الأراضي بتعتك أو من البنك الخاص بتاعك. ومتنساش انك مش حتقدر تحرك الورق اللي معاك اللا فدورك بس.